Mungshawa masha ni galaw lu galaw sha ai shara de, gumshem Myen hpyen ni sinat kaba hkrup mara gap shadam
KIA Masat (3) Dap Ba, Masat (1) Dap Dung ginra, Maje mare htum pa kaw dap jung shara la nga ai, gumshem Myen hpyen dap Hk.M.Y (319 hte 601) dap lapran na sinat kaba dap ni Loi Jung Bum maga de, sinat kaba hkrup mara gap shadam bun ai lam chye lu ai.
“May shata praw 6 ya shana hkying 10:46pm aten daram hta Myen hpyen ni Loi Jung Bum maga de sinat kaba (4) lang gap shadam bun ma ai” nga nna Manje mare masha langai tsun ai.
Sinat kaba gaw 82mm zawn re ngu gaw maram ai, shanhte gap bun ai shara gaw mungmare masha ni galaw lu/sha ai shara re, masha hkra hkala ai nga shiga gaw nna ai raitim, ya na zawn mungmare masha ni bungli galaw sha ai shara de gap bun wa ai majaw, mare masha hkrit tsang nga ai lam, mare sha wa matut tsun ai.
Lai wa sai April shata 11 ya shani hta mung, ndai sinat kaba dap na gumshe Myen hpyen ni Nam Yu Pa hkran hte Chyauhkawng nam maling maga de gap shadam bun ai lam mung nga lai wa sai re hpe mung chye lu ai.
