Mungshawa ni a modo 7 wan nat jahten hkrum

Mungmyit Sin Li Ga ( Kachin Sub-state ) KIA Dap Ba 4, Dap Dung 9 ginra, Nam Gut hte Hu Nawng mare lapran kaw September shata praw 3 ya shana hkying 6 aten daram hta nta jawn modo 3 hte gun rai htaw modo 4 wan nat kau hkrum ai lam na chye lu ai.

Modo nat hkrum ai hta jawn lawm ai mungshawa ni hte modo sara ni hpe September shata praw 4 ya shani hta shinggyim nau na garum ningtum hpung ni wa woi la ai lam, buga masha ni kawn chye lu ai.

Myen Hpyen Dap ni hte Dingdung daw Dap Hpawm 3 rai nga ai Kokang MNDAA, Ta-ang TNLA hte Rakhine AA ni gaw August shata 15 ya shani kawn Lashio, Kutkai hte Muse lam hta gasat gala majan byin nga ai rai nna hkrun lam hkawm mungshawa ni a modo nat jahten hkrum ai gaw yawng rai yang modo 10 jan nat jahten kau hkrum sai re hpe chye lu ai.