Mungshawa ni a nta sun wang nhpan shadaw ni hpe Myen Asuya Namkawn ni sa jahten kau nhtawm, pyen dau jun tawn

Manmaw Ginwang, Manje lahta tsang laika sharin jawng shingdu, Pyin Oo Lwin lawk shingdu kaw nga ai mungshawa ni a nta sun wang nhpan shadaw ni hpe November shata 20 ya shani hta Manje Myen Asuya Namkawn ni sa run jahten kau nhtawm, pyen dau jun kau ya ai lam chye lu ai.

Asuya ni a Namkawn shara gaw re raitim, ndai shara hta yi sun dum nta galaw nga na matu, lai wa sai hta lit ang ai Namkawn Du wa hpe mung tsun jahkrup ahkang hpyi ai, Manje Muklum Uphkang Du ni hpe mung tsun jahkrup nna nga hpang wa ai shara gaw re. Ndai shara hpe mare bai jat na matu Manje Muklum Uphkang Salang ni hte mare a kanu kawa ni zuphpawng galaw nhtawm, Naypyitaw de laika bang da ai, nga nna Pyin Oo Lwin lawk na salang langai tsun ai.

Ya bai galai ai Namkawn Du wa gaw mare salang ni hpe hpa mung ntsun, n shana ai sha, nta rai n-gap shi ai hpri ju hte nhpan kum da ai hpe run kau ya ai. Shadaw ni hpe gaw Chaingsaw jak hte ret daw kau ya ai, dai majaw nta galaw nga ai ni gaw gara hku kaning rai wa na kun nga grai myit ru nga ma ai lam, salang wa matut tsun ai.

Dai shara kaw nga taw ai mungshawa ni gaw Kai Htik, Hka Hkye hte Sam Mung maga na wa htawt nga ai ni re. Nta htinggaw 50 daram rai nna ndai shara kaw lai wa sai 2003 ning kaw nna nga hpang wa ai re lam chye lu ai.