Mungshawa ni nga ai mare kahtawng ni hpe Myen hpyen dap kawn pat hkum gaiwang masat
KIA Dap Ba ( 3 ) Dap Dung ( 27 ) ginra, Mung Hkawng mare kaw dap jung nga ai Myen hpyen hpung ni gaw, February praw 1 ya shani kaw nna, Ulang Pa ginwang, Mali Pa ninghtawn kata na mungshawa ni a mare kahtawng 10 hpe pat hkum gaiwang masat kau ya ai lam, buga na salang langai shana wa ai.
Pat hkum gaiwang masat hkrum ai mare kahtawng ni gaw, Laika mare, Zup Ja mare, Hka Wan Pa mare, Je Sawn mare, Mung Lu mare, Hpaga Rai mare, Kung Hka Pa mare, Hka Pra Yang mare, Nam Hpu mare hte Mahkaw Yang mare ni re.
Ya na zawn Myen hpyen dap ni kawn pat hkum gaiwang masat ai majaw, dai ginra hta shapre sun, chyinghkrang sun ni hpe nlu dan la, nlu zingla ai, hkauna mam ni hpe mung nlu htaw la ai sha n-ga hprawng mat wa ra ai, anhte gaw dai ni hpe naw wa zingla mayu ga ai raitim, Hpyen asuya kaw na gaw dai ginra de tsep kawp nsa na matu tsun sadi jaw da ai re majaw, dai hpe bai wa lu la na matu dai ni du hkra ladat nlu shaw shi ai lam, salang wa tsun ai.
Pat hkum gaiwang masat hkrum ai mare kahtawng hkan na mungshawa ni gaw, Munghkawng hpyen yen dabang hte Man Maw Robert hpyen yen dabang shara ni hta wa machyu nga ai lam chye lu ai.
KIA Dap Ba ( 2 ) Dap Dung ( 6 ) ginra, Ja Ra Yang grup yin kaw shamu shamawt nga ai Myen hpyen hpung ni mung, February 11 ya shani Hu Pa mare hte Ja Ra Yang mare ni hpe htawt sit na matu tsun shadut nga ai lam matut na chye lu ai.
