Mungshawa ni nga ai shara kaw nbungli bawm jahkrat bun ai majaw, marai 18 asak si sum, marai 28 hkala hkrum
KIA Masat 8 Dap Ba ginra, Gahkyeng Bum Ginwang, Gahkyeng Bum Ginwang Daw, Kawng Ja Ninghtawn kata na Hti Lin jawng shawng kaw, January shata 22 ya shana daw gumshem Myen hpyen dap ni, nbungli bawm wa jahkrat gasat ai majaw, mungshawa marai 18 asak si sum nhtawm, marai 28 hkala hkrum ai lam na chye lu ai.
Myit dum akyu hpyi hpawng galaw na matu hkyen shajin nga ai aten hta gumshem Myen hpyen dap ni, Jet nbungli hte bawm 4 lang wa jahkrat gasat ai re lam chye lu ai.
January shata 22 ya shani hta sha, gumshem Myen hpyen dap ni nbungli hte Magway ginra, Aung Lan mare kaw bawm wa jahkrat gasat ai majaw, mungshawa marai 5 asak si sum nna, marai 10 hkala hkrum ai lam, ginra masha ni tsun ai kaw na chye lu ai.
January shata 21 ya shana hta mung, Indaw ginwang Mawlu Muklum Man He mare baw kaw gumshem Myen hpyen dap ni nbungli bawm jahkrat gasat ai majaw, Mungshawa Makawp Hpyen la marai 5 asak si sum nhtawm, mungshawa marai 2 hkala hkrum ai lam, ginra shiga lawk kaw na chye lu ai.
Ya aten KIO uphkang ginra, Rakhine ginra hte Sagaing ginra ni hta shani shagu ngu na gumshem Myen hpyen dap hte gasat gala majan laja lana byin nga ai hpe mung chye lu ai.
