Mungshawa ni tinang a Dumsu, Nga ni hpe wa lakawn na matu, Danai D.K.Ts hpyen dap kaw ahkang sa hpyi yang ahkang njaw
KIA Dap Ba ( 2 ) ginra hta majan a majaw Danai Muklum kaw hpyen koi yen nga ai, Zup Mai mare hte Nawng Nyeng mare na mungmasha ni, June 30 ya shani Danai D.K.Ts hpyen dap kaw sa nna, mare buga na Dumsu, Nga ni hpe wa lakawn la na matu, ahkang sa hpyi yang ahkang njaw ai lam, buga masha ni kaw na chye lu ai.
Myen hpyen dap ni tsun ai gaw, “Nanhte a matu shimlam nnga ai Hpaure Kahtawng hte Nhtang Kahtawng hkan rai yang gaw mai ai anhte a masha ni nga ai” ngu hkap tsun ai lam chye lu ai.
Laiwa sai bat hta Danai hka Seng Tawng mare dingsa lam maga shamu shamawt nga ai Myen hpyen hpung ni gaw, Danai mare na mungshawa ni, yi sun, hkauna sa ai ni kaw na n-gu, gumhpraw arung arai mu ai yawng sawk la kau ya ai lam, buga na salang langai shana wa ai.
Dai Myen hpyen hpung ni gaw, lawu ga na lung wa ai hpyen manam ni re. Mu ai mungmasha ni hpe jahkrit shama galaw ai hte Awng Lawt mare maga masha sa nsa sagawn ai ni re lam chye lu ai.
