Mungwi Buga Sasana (100) ning hpring chyeju shakawn hpawng hte jaw wunli manau poi galaw

Mungmau Ginwang, Mungwi buga sasana (100) ning hpring chyeju shakawn hpawng hte jaw wunli manau poi hpe March shata 21 ya shani kaw na galaw nga ai lam chye lu ai.

Chyeju shakawn hpawng hpe March shata 21 ya shani kaw na, 24 ya shani du hkra, Mungwi buga kaw galaw na re lam ginra masha langai tsun ai.

March shata 21 ya shani kapang hpaw ai lam, 22 ya shani hkalup hkam ai lam, manau nau ai lam hte 23 ya shani jaw chyeju shakawn hpawng ni hpe galaw sa wa na lam chye lu ai.

Mungwi buga hpung hta kahtawng 9 nga ai rai nna, dai mare kahtawng ni gaw, Mungwi, Dum Yum, Loi Hkyep, Dum Buk, Kawng Sung, Byeng Lung, Pang Kanoi, Mam Wum Lahta, Mam Wum Lawu hte Nawng Bat kahtawng ni re lam chye lu ai.

Lai wa sai 1922 ning hta sasana shang hpang wa ai rai nna, 2022 ning kaw (100) ning hpring sai hte 2023 ning kaw sasana (100) ning hpring chyeju shakawn hpawng hpe galaw ai lam chye lu ai.