Muse RCM hpyen yen nta masha ni a chyeju shakawn akyu hpyi hpawng galaw
Muse RCM Camp nta masha ni a chyeju shakawn akyu hpyi hpawng hpe March shata 28 ya shani hkying 10:30am aten hta Humun lawk, San Petru Kahtawlik Nawku jawng wang kaw galaw ai lam chye lu ai.
Laiwa sai 2014 ning May shata praw 4 kaw nna, ya dai ni ten du hkra shim lum ai the myit kaji karen ai lam nnga ai sha, wuhpung wuhpawng ni a npu e ngwi pyaw ai hte shingbyi lu ai lam hpe chyeju dum shakawn ai hku nna lamang kadun galaw ai re lam, Muse RCM Camp kaw na Saranum Galoria Hkawn Bu tsun ai.
Hpyen yen htinggaw yawng 17 rai nna, April shata praw kaw nna htinggaw langai hpang langai Mungbaw Nam Gut mare lawu kaw wa htawt nga na re lam, Saranum matut tsun ai kaw na chye lu ai.
Hkamja lam hte seng nna Ga Yu Na (ဂရုဏာ) hte IRC ni kaw nna madi shadaw let Camp kata kaw tsi gawk ni hpaw da ya ai lam, Covid 19 ana hte seng nna machye machyang garan kachyan ya ai lam, ningmu jahpaw hkaw tsun dan ai lam ni galaw nga ai re hpe mung chye lu ai.
Masha law law hpawng de ai lam nmai galaw ai majaw, Camp masha ni hte Ga Yu Na (ဂရုဏာ) kaw na Sara ni shang lawm nna chyeju shakawn akyu hpyi la ai re lam chye lu ai.
