Mya Tawng Myen dap hpe KIA ni zing
KIA Masat (11) Dap Ba, Masat (12) Dap Dung ginra, Mya Tawng gumshem Myen hpyen dap hpe KIA ni padang dip zing la lu sai lam chye lu ai.
August shata 23 ya shana maga hkying 4:00pm aten daram hta Hti Chyai Mya Tawng kaw dap jung nga ai, gumshem Myen hpyen dap hpe KIA pawng hpawm hpyen hpung ni padang dip zing la lu sai lam, lit nga ai salang ni kaw na chye lu ai.
Ndai hpyen dap hpe August shata 21 ya shani kaw na htim gasat wa ai hta dai shani jang, makawp dap shara (3) hpe shawng padang dip la lu ai rai nna, dai ni August shata 23 ya shani Mya Tawng hpe bai zing la lu ai re lam chye lu ai.
Gasat gala majan byin nga ai aten, gumshem Myen hpyen dap ni nbungli hte laja lana gasat garum ai raitim, KIA pawng hpawm hpyen hpung ni padang dip la lu sai lam chye lu ai.
Ya aten Sagai jarit Katta, Hti Chyai, Indaw, Pin Le Bu, Naba hte Kanbalu ginra ni hta KIA hte gumshem Myen hpyen dap ni majan byin nga ai hta gumshem Myen hpyen dap ni kaw nna mung, nbungli hpe madung dat let gap gasat nga ding yang re hpe chye lu ai.
