Mya U Yin Lung Seng Company ni wang nhpan kum masat la ai nawku jawng wang lamu ga hpe bai jaw
Hpakant, Sang Hka mare Hkalup Hpung nawku jawng wang kata na lamu ga Pe 100 jan hpe Mya U Yin lung seng company kaw nna wang nhpan shang kum masat la ai hpe Februay shata praw 8 ya shana maga Company maga de na Salang ni hte Sang Hka nawku hpung magam gun ni jahkrup bawngban ai hpang company ni kawn lamu ga hpe bai jaw sai lam buga masha ni kawn chye lu ai.
Company kawn February shata praw 6 ya shani nhpan sa kum masat ai lam galaw ai hpe Sang Hka mare hpung masha ni kawn February shata 8 ya jahpawt nhpan sa run hpya kau ya ai lam nga ai, Company maga de na Salang ni hte Sang Hka nawku hpung magam gun ni lahkawng maga na Salang ni bai jahkrup bawngban ai hpang dai lamu ga hpe bai jaw ai, mi na mung nawku jawng wang lamu ga re ai majaw nawku jawng lamu ga hpe nhkra na matu re lam, Sang Hka Nawku Hpung Amu Madu Salang Lamai Brang Seng tsun ai kaw na chye lu ai.
Ndai lamu ga gaw lai wa sai shaning ni hta Mya U Yin lung seng company ni kawn mawdaw lai lam a matu garum hpyi jai lang ai lamu ga shara re hpe chye lu ai.
