Myen Mungdan Hpyen Dap, Dap Awn Daju Min Aung Hlai hte KBC Hpa-awn ni hkrum zup
Photo Credit; KBC Kachin
Myen Mungdan Hpyen Dap, Dap Awn Daju Min Aung Hlaing hte KBC hpa-awn ni, December shata praw 1 ya shani hkying 10:00am aten hta M.P.Hk, Malihka Yik Tar kaw hkrum zup shaga lu sai lam na chye lu ai.
Hkrum zup ai lam hta madung hku nna hpyen yen ni tinang a dum nta buga de yawng bai nhtang wa lu na lam, COVID-19 byin nga ai ten hta yawng jawm sadi nna ninghkap sa wa na lam hte Simsa lam lu wa hkra nawku hpung ni mung jawm akyu hpyi karum shakut na lam ni hpe hkrum shaga ai lam re.
“Daini na hkrum zup shaga ai lam hta daw dan ai lam kaga gaw nnga ai. hkrum zup shaga ai daram sha re. IDPs hte seng ai hpe madung hkrum shaga nna COVID-19 hte seng ai lam ni hpe matut makawp maga na matu hkrum zup tsun shaga ai lam re, kaga daw dan ai lam nnga ai” nga nna Waimaw Ginwang Amu madu Sara Dau Hkawng tsun ai.
Myen mung Hpyen Dap, Dap Awn Daju Min Aung Hlaing kaw nna hkrum zup shaga na matu saw shaga ai majaw KBC Ningbaw Rev.Dr.Hkalam Samson woi awn ai hte KBC Ningtau Amu madu, HDD Hpa-awn, Shamai Shatsai Hpa-awn, MKBA Amu Madu, Waimaw Ginwang Amu Madu ni kaw nna sa du hkrum zup ai re lam chye lu ai.
KBC hte Myen mung Hpyen Dap, Dap Awn Daju Min Aung Hlaing hkrum zup tsun shaga ai lam hta daw dan shagrin da lu ai lam nnga ai raitim IDPs hte seng nna Asuya lahkawng maga kaw nna hkyen lajang nga ai lam ni, anhte a mungdan grau nna simsa wa lu na hte COVID-19 hpe mung grau nna nbyin wa hkra jawm makawp maga na lam ni hpe tsun shaga la lu sai re lam KBC kaw nna chye lu ai.
