Myen Asuya jawng ni hta Jinghpaw wunpawng amyusha ni a labau maumwi sharin sa wa na
Jinghpaw Wunpawng Htunghking hte Laili Laika Hpung Ginjaw (JHG) kaw nna Jinghpaw mungdaw ting hta nga ai Myen Asuya jawng ni hta Jinghpaw wunpawng amyusha ni a labau maumwi laika buk hpe gyin hpan (Subject) langai hku na sharin sa wa lu na matu masing jahkrat let hkyen lajang nga ai lam chye lu ai.
Ndai mau mwi labau laika buk hpe lawu tsang jawng, tsang 1 hte tsang 2 hta shawng ningnan sharin hpang sa wa na rai nhtawm matut nna mung ninggam hte ninggam tsang kaba du hkra, sharin sa wa lu na matu, hkyen lajang nga ai lam JHG kaw nna chye lu ai.
Jinghpaw Wunpawng Htunghking hte Laili Laika Hpung Ginjaw (JHG) Ningbaw Duwa Htingnan Yaw Sam kaw nna, ya na zawn hpaji jaw tsun da ai.
“Amyu kaba langai mi rawt jat galu kaba wa lu na matu gaw laika gaw grai ahkyak ai re. Dai majaw anhte Jinghpaw wunpawng myusha ni yawng, laika kanu rai nga ai Jinghpaw laika hpe yawng madi shadaw nna amyu kaba tai wa ga”
JHG kaw nna ginwang 18 ting hta nga ai asuya jawng ni hta Jinghpaw laika hpe sharin nga sai rai nhtawm labau maumwi laika buk hpe mung, gyin hpan (Subject) langai hku nna matut hpung jat sharin hpang sa wa lu na matu, tatut hkrang shapraw ai hte masing jahkrat hkyen lajang nga ai re.
Myen Asuya jawng ni hta Jinghpaw labau maumwi laika sharin sa wa lu na hte, labau laika buk hpe tatut galaw sa wa lu na matu, Asuya Htunghking hte Laili Laika Hpung Jinghpaw mung lithkam matsun du Ei Ei Htwe hte Ningtau lithkam ni, komiti malawm ni hte rau, October shata praw 5 ya shani hta JHG rung kaw hkrumzup bawngban la lu sai re.
Jinghpaw Wunpawng Htunghking hte Laili Laika Hpung Ginjaw (JHG) kaw nna ginwang 18 ting hta nga ai asuya jawng ni hta laika kanu rai nga ai Jinghpaw laika hpe sharin sa wa na matu Myen mung asuya hte myit hkrum let 2013 ning kaw nna, masing jahkrat hkyen lajang sa wa ai rai nna 2018 ning kawn tatut laika sharin hpang sa wa ai re lam chye lu ai.
