Myen asuya jawng Saranum langai gaw tsang 4 jawngma marai 15 hpe dam jaw adup zingri
Mungmyit Sinli Ga ( Kachin Sub-state ) Muse Muklum kaw nna mile 13 daram tsan ai Namtau mare hta hpaw tawn ai Myen asuya lahta tsang jawng na Myen saranum Daw Lung Lung gaw August shata praw 2 ya shani hta san poi hkrat ai tsang 4 jawngma marai 15 hpe dam jaw adup zingri ai lam na chye lu ai.
Saranum Lung Lung gaw tsang 4 gawk hta English laika hpe sharin ya ai wa rai nna, August shata praw 1 bat hpang 4 ya shani gaw shata san poi htai ai re. August shata praw 2 bat hpang 5 ya shani gaw san poi hkrat ai jawngma marai 15 hpe shaga shapraw la nhtawm, labu ni raw shakrin kau shangun nna marai 1 hpe shingna hte 5 lang lang adup ai, jan prang kaw mung, lata sharawt dam jaw shatsap da ai sha n ga namdum na hkyi sa la nna n gup hkan achya ya ai, nga nna Namtau mare na Salang langai tsun dan ai.
Ya na zawn jawngma ni hpe mala shala yu nhtuk hkra dam jaw adup ai sha n ga hkyi du hkra achya ya ai hpe jawngma ni a Kanu Kawa ni gaw Saranum Lung Lung kaja wa galaw ai kun? N galaw ai kun? lawnglam hpe chye mayu nna simani ai hku sa san yang saranum gaw atsawm sha sanglang tsun dan ai lam nnga ai sha, sa san ai Kanu Kawa ni hpe mung, hpyenla ni hpe shaga la nna nanhte mare ting hpe shamyit kau shangun na ngu, bai nhtang jahkrit sharim wa ai lam, Salang wa tsun dan ai.
San poi she hkrat yang dai zawn labu ni raw shakrin nna adup, n gup hkan hkyi ni achya ya ai ngu gaw n galaw ging ai lam re. Ndai zawn re jawng saranum hpe gaw tara upadi hte maren ahkyak la nna htawng jahkrat kau ra ai, nga nna Salang wa shi a ningmu hpe matut tsun ai.
Adup zingri damjaw hkum ai jawngma ni gaw Gam Seng, Hka Li, Gun Jat Doi, Gun Di Awng, Tu Bung, Ngawa Ta, Ai Htawn, Awng Sa, Bawk Ja, Pan Seng Ja, Naw San, Hkawn Tsin, Ma Hkam, Lu Awng hte Gun Awng ni re.
Ya na zawn san poi hkrat ai jawngma ni hpe adup abyen dam jaw nna n gup hkan hkyi achya ya ai mabyin lawnglam hte seng nna lit nga ai mare uphkang salang ni kaw nna mung, seng ang ai asuya rung de tang shana da sai nga ai raitim, ya du hkra hpa laklai wa ai lam, nnga shi ai lam, buga masha ni kawn chye lu ai.
Ya gaw Ma ni hpe shingna hte adup abyen dam jaw ai lam tsep kawp nmai galaw sai re. Galaw ai jawng sara/num ni hpe gaw htawngdam shata 1 shing nrai shata 6 hte gumhpraw dam 100,000 ( Sen Mi ) shing nrai 300,000 ( Sen Masum ) shawa na. Ndai tara hpe 2019 ning July shata 23 ya shani hta Ma ahkaw ahkang hte seng nna pukma 68, hte 69 ni hta hkan sa ra ai rit kawp tara ni hpe jahkrat da sai lam chye lu ai.
