Myen Dapnu ( 99 ) kata na hpyen hpung ni, mare masha ni hpe zuphpawng woi galaw
Mungmyit Sinli Ga ( Kachin Sub-State ) KIA Dap Ba ( 10 ) Dap Dung ( 17 ) ginra, Gangming Loidau Ginwang, Na Leng Ninghtawn kata Na Leng Mare RCM nawku jawng kaw September 23 ya shana daw hkying 4:00pm aten hta Myen Hpyen Dapnu ( 99 ) kata na ဒုရင္းမွဴး ဗုိလ္မွဴး ထက္ေအာင္လင္း hpung ni kawn mare masha ni hpe zuphpawng woi galaw ai lam, shawnglam shisawk ni kawn chye lu ai.
Zuphpawng hta ဒုရင္းမွဴး ဗုိလ္မွဴး ထက္ေအာင္လင္း tsun ai gaw, Nanhte mare masha ni KIA hpe madi shadaw makoi ya ai majaw, ndai ginra hta KIA nga nna manghkang byin ai masum lang rai sai. Manghkang matut byin jang, mare masha ni hpe sat kau na, dum nta ni hpe mung, wannat kau ya na, KIA hte tsep kawp matut mahkai n galaw na matu ta masat htu ra ai ngu tsun ai.
Zuphpawng ngut ai hpang ntsen nhten ai mare masha ni a dum nta hkan sawk jep hkawm ai, mare salang ni hpe mung, sumla gayet la nhtawm, KIA ni du jang shiga jaw na matu phone nambat mung jaw kau da ai lam chye lu ai.
Ya aten, Myen Dapnu ( 99 ) kata na hpyen n-gun 200 jan gaw, KIA Dap Dung ( 17 ) ginra hta ginra jasan ga baw hte matut manoi shamu shamawt nga ai lam chye lu ai.
