Myen hpyen dap hte KIA ni gasat gala majan laja lana matut byin

KIA Dap Ba ( 2 ) Dap Dung ( 14 ) ginra, KIA hpyen hpung ni shara jahkrat nga ai, Chan Ta post, Dawi post, Chyahkya Tu Kawng ni hta January 31 ya shana daw hkying 2:05pm aten kaw na hkying 2:30pm aten laman Jet nbungli ( 2 ) hte bawm wa jahkrat bun nna, jak sinat hte numdaw ( 3 ) lang wa htim gap ai lam, shawnglam na salang langai shana wa ai.

Nbungli hte wa htim gap ai hpang, Mung Hkawm mare kaw nga ai Myen hpyen dap ni mung, KIA ni nga ai Chanta Kung, Dawi post hpyen man maga de, laknak kaba hte gap bun nna lagaw lam hku mung htu lung wa ai majaw laja lana gap hkat ai lam nga ai.

KIA Dap Ba ( 3 ) Dap Dung ( 27 ) ginra hta mung, January 31 ya shani Manmaw maga kawn lung wa ai Jet nbungli ( 1 ) KIA ni nga maga de bawm wa jahkrat bun nna, jak sinat hte mung wa htim gap ai.

Myen hpyen dap ni gaw KIA hpyen hpung ni nga ai shara shagu de, htu majan galaw nga ai sha n-ga Jet Fighter nbungli ni hte mung, wa htim gap ai lam chye lu ai.