Myen hpyen dap hte KIA ni Nam Hkawng mare makau bum kaw laja lana gasat poi byin
Mungmyit Sinli Ga ( Kachin-Sub-state) Munggu Ginwang, KIA Dap Ba 6, Dap Dung 36 ginra, Nam Hkawng mare makau bum kaw September shata 25 ya shani hkying 12:30pm aten hta Myen hpyen dapnu 88 hte KIA Dap Dung 36 kata na hpyen hpung ni gasat gala majan byin ai lam, shawng lam shi sawk ni kawn chye lu ai.
Myen hpyen dap ni kawn ginra jasan let ma ja htu shadut gap bun ai majaw ninghkap shingla gasat gala majan byin ai re.
September shata 24 ya shani hta mung shana hkying 8:00pm aten du hkra Myen hpyen dapnu 88 kata na hpyen hpung ni hte gasat gala majan byin ai lam chye lu ai.
“Mana de ma ginra jasan majan baw ai re. Tim bai nhtang ai lam nnga shi ai. Ya ma naw htu shadut lung wa na masa re.Dai majaw ding yang naw ngoi na masa re.” nga nna shawng lam na salang langai tsun dan ai.
Mana maga byin ai majan hte daini byin ai majan gaw Myen hpyen dapnu 88 kata na hpyen hpung ni sha rai nhtawm hpyen man lahkawng hte gap gasat htu shadut lung wa ai re.
Ndai majan byin ai lam gaw daini hte sha ngut na masa nnga ai. Matut manoi byin wa na re. Bai hkring bai gap rai nga ai sha n-ga, dai na, hpawt ni, hpawt din hkan mung majan naw byin wa na masa re lam shawng lam na salang langai masam maram tsun dan ai.
Ndai Myen hpyen Dapnu 88 kata na hpyen hpung ni hte Dap Dung 36 kata na hpyen hpung ni gaw September shata praw 2 ya shani kaw nna matut manoi gasat gala majan byin lai wa ai rai nna KIA Dap Ba 10, Dap Dung 17 ginra hta mung Kokang (MNDAA) hpyen hpung ni hte gasat gala majan byin lai wa sai re.
Ndai ginra kata de Myen hpyen hpung ni, hpyen n gun dingyang lung wa nga ai rai nna hpyen n gun 700 daram ngu sawn lu ai hpyen hpung ni mung dingyang shamu shamawt taw nga ai re lam shawng lam na salang langai Septenber 19 ya shani hta tsun lai wa sai.
Munggu Ginwang, KIA Dap Ba 6, Dap Dung 36 ginra hta mung Myen hpyen hpung ni shamu shamawt nga dingyang rai nna lahkawng maga naw maja nga dingyang re lam shawng lam shi sawk ni kawn chye lu ai.
