Myen hpyen dap hte Kokang MNDAA ni gasat majan byin ai majaw mungshawa marai 2 pala hkra nna langai asak si sum mat

Mungmyit Sinli Ga ( Kachin Sub-state ) KIA Dap Ba 10, Dap Dung 2 ginra hta August shata 13 ya shana de hkying 3 hte hkying 4 lapran aten hta Shai Je Pa mare ( Sha Zigu ) makau kaw Myen Dapnu 99 kata na hpyen hpung ni hte Kokang MNDAA hpyen hpung ni gasat gala majan byin ai majaw, mungshawa marai 2 pala hkra nna langai asak si sum mat ai lam, buga masha ni kawn chye lu ai.

Pala hkra hkala ai yan kaw na Sara Lahpai Zau Shan Lum asak 58 ning, Kuthkai daw 5 ( Mungji Mare Lahta Tsang Jawng Up ) gaw sinat kaba pala hkyep, garep makau kaw hkra hkala ai. Shadang Mahaw Naw Mai Asak 20 ning gaw sinat kaji pala hte baw kaw hkra ai majaw dai shara kaw asak si sum mat ai re lam chye lu ai.

N nga mat ai Shadang Mahaw Naw Mai hte kanau La Nan shan nau gaw Na Yi mare nta kaw U, Wa ni yaw kau da nna, Tamunye nta de cycle hte yu wa yang Shai Je Pa mare htum pa kaw Myen hpyen la ni nmai lai shi ai ngu lam kaw hkap jahkring tawn da ai, kade nna yang sinat ngoi wa ai kadai gara kaw na gap dat ai re n chye ai kahpu Mahaw Naw Mai a baw kaw pala hkra nna dai shara kaw nan nnga mat ai, nga nna Tamunye mare na Hpawmi langai tsun dan ai.

Moi mang hpe gaw dai ni August shata 14 ya jahpawt hta mare myitsu salang ni, nawku hpung woi sara ni hte nta masha ni sa nna Myen Hpyen ni lup tawn da ya ai hpe wa htu shaw la nhtawm, shani ka-ang hkying 12:30pm aten daram hta Na Yi mare dingsa makau kaw akyu hpyi makoi mayang sai lam chye lu ai.

Hkala hkrum ai Sara Lahpai Zau Shan Lum gaw Kuthkai mungshawa tsi rung kaw tsi tsi hkam la nga ai re lam na chye lu ai.