Myen Hpyen Dap kaw nna Jet Fighter nbungli hte bawm wa jahkrat
Gumshem Myen Hpyen Dap kaw nna KIA Masat (19) Dap Dung hte Masat (30) Dap Dung ginra kaw April shata 12 ya jahpawt hkying 7:00am aten kaw nna shana hkying 10:20pm aten du hkra Jet Fighter nbungli hte bawm (14) lang wa jahkrat bun ai lam, shawng lam na lit nga ai salang ni tsun shana wa ai kaw na chye lu ai.
Jahpawt hkying 5:30am aten kaw nna Alaw Bum makau hte Bum Chyang post shawng kaw na Ri Tu Kawng post makau kaw KIA hpyen hpung hte Hk.L.Y (47), Hk.M.Y (320, 387, 437, 438) na pawnghpawm hpyen hpung ni hte gasat gala majan laja lana byin ai re.
Myen Hpyen Dap Hk.L.Y (142) Dap ni gap dat ai lak nak kaba (105mm) pala si (1) Miwa hkran na salang Yang Fa a Gyeng Gaw sun kaw wa hkrat ai lam chye lu ai.
Jahpawt hkying 2:30am aten daram hta Ma Hkoi Amyawk Dap (A.M.T) (366) dap kawn gap dat ai ngu maram ai laknak kaba si mare kaw hkrat nna, hkala asak si sum ai ni gaw, Myo Tit mare na Daw Khin Pu asak 21 ning, Tsi Hat mare Hpunggyi jawng up Sara Daw U Uk asak 38 ning, U Poi Maung asak 55 ning, Shwe Myawng mare na Maung Aik Shan asak 23 ning hte Tsi Hat mare na asak 84 ning mying nchye dinggai langai hte Shwe Myawng mare na Daw Si asak 83 ning ni re lam chye lu ai.
Shani hkying 1:006pm aten hta hta gaw, KIA Masat (8) Dap Ba ginra, Mu Nyin kaw nna pru wa ai Myen Hpyen Dap a jak sau htaw Mawdaw (3) hte shimlam la ya ai Mawdaw (3) hpung ni hpe, KIA Masat (11) Dap Dung ginra, Gat Shang Yang mare makau kaw KIA hpyen hpung ni bawm hte hkap shingla gasat ai lam chye lu ai.
