Myen hpyen dap kawn Ja htu lauban ni hpe shaga la nna zuphpawng woi galaw

KIA Dap Ba 2 Dap Dung 14 ginra, Wa Hka Ja Maw kaw Ja htu sha nga ai lauban marai 5 hpe May shata praw 6 ya shani hta Myen hpyen dap kaw shaga la nna Hk.L.Y 297 Dap Up wa zuphpawng woi galaw ai lam na chye lu ai.

Dai Myen hpyen du wa tsun ai gaw, ndai May shata hta Tsan Pya mare hpunggyi jawng kaw shagyit ( Gate ) dung shara jahkrat nna, Jak Sau hte N-gu malu masha pru shang jen jep sa wa na re hte masa hta hkan nna Lawt Ja mare na jak li daru du hkra masha jahkrat da na ngu tsun ai lam chye lu ai.

Wa Hka Ja Maw kaw Ja htu sha ai mungshawa law malawng gaw Myen, Sam, Rakhine ni rai nna Jinghpaw ni gaw ran rau sha re lam, Jahtu Zup buga masha ni kawn chye lu ai.