Myen Hpyen Dap ni ေက်ာက္မဲ ginra masha langai hpe jawm adup zingri

Mungmyit Sinli Ga (Kachin Sub-state) ေက်ာက္မဲ ginra kata, RCSS/SSA hpyen hpung ni hte Myen Hpyen Dap ni gasat poi byin ai majaw, Et Gyi mare masha ni hpyen koi yen hkrum ai hta, mare kaw ngam nga ai asak 60 daram re ai U Aik Maung hpe Myen hpyen hpung ni kawn June shata 29 ya shani jawm adup zingri ai re lam, ginra masha ni tsun shana wa ai kaw na chye lu ai.

Myen hpyen hpung ni jawm adup zingri hkrum ai U Aik Maung gaw ningma grai sawng ai majaw, ya aten ေက်ာက္မဲ mung shawa tsi rung kaw tsi tsi hkam la nga ai lam chye lu ai.

June shata 29 ya jahpawt hta mung, ေက်ာက္မဲ Ginwang, Pan Chyan mare kata Myen Hpyen Dap kawn gap dat ai lak nak bawm wa hkrat bun ai majaw, asak 56 daram re ai Salang langai asak si sum ai sha n-ga, amyu shayi 2 hkala hkrum ai lam na chye lu ai.

RCSS/SSA hpyen hpung ni hte Myen hpyen hpung ni gasat poi matut manoi byin ai majaw, ေက်ာက္မဲ ginwang kata hta hpyen koi yen masha yawng marai 500 jan nga sai sha n-ga, dai hpyen koi yen hkrum masha ni a matu malu masha ra kadawn nga ai lam na chye lu ai.

Ya aten hpyen koi yen hkrum nga ai mung shawa masha ni gaw laiwa sai 2016 ning hta ေက်ာက္မဲ ginra kata RCSS/SSA hpyen hpung ni hte Myen Hpyen Dap ni gasat poi byin ai aten kalang, hpyen koi yen hkrum lai wa sai mung mare masha ni re hpe mung matut chye lu ai.

Photo Crd; Fb