Myen hpyen dap ni gap dat ai laknak kaba Laiza makau kaw wa hkrat kapaw ai majaw, jawng saranum langai hkala hkrum
KIO ginjaw Laiza grup yin hta shara jahkrat nga ai Myen hpyen dap ni, December 24 ya shana hkying 9:00pm aten laknak kaba hkrup mara gap bun ai hta Laiza Woi Chyai IDPs ni nga ai makau kaw pala langai wa hkrat kapaw ai majaw, jawng saranum langai hkala hkrum ai lam chye lu ai.
Dai jawng saranum Lahpai Kai Nan gaw, Woi Chyai kaw nga ai kana Shawng a nta kaw wa chyai nna, kana Ji a kasha Ma marai lahkawng hte saranum shi nga ai Hpaji Rung de lam hkawm yu wa ai kaw byin ai re.
Ma yan nau kaw hpa nbyin ai raitim, saranum Lahpai Kai Nan a du krung kaw pala hkyep langai, hkra lata kaw langai shang mat ai, du krung hku shang ai lapa hkyep a majaw la-pai shakap hte Wa lahkawng daw mat ai, pala hkyep langai gaw mana jang Laiza mungshawa tsi rung kaw shaw kau lu sai re lam chye lu ai.
Lai wa sai December 14 hte 15 ya hta mung Hka Ya Bum, Bum Re Bum kaw shara jahkrat nga ai, Myen hpyen dap ni Laiza makau grup yin de laknak kaba ni hte gap bun sai rai nga ai.
