Myen hpyen dap ni gap dat ai laknak kaba si a majaw, mungshawa marai 4 asak si sum nna marai 6 hkala hkrum
Oplus_131072
Gasat gala majan matut byin nga ai, Hpakant ginra hta September shata 17 ya shani, Byuha kawng kaw na gap dat ai laknak kaba si a majaw, mungshawa marai 4 asak si sum nna marai 6 hkala hkrum ai lam chye lu ai.
Hpakant Byuha kawng kaw na gumshem Myen hpyen dap ni laknak kaba hkrup mara gap shadam bun ai hta Mana mare, Sharaw Hka, Maw Shan, San Chyoi hte Seng Ja Bum mare ni hkan wa hkrat kawpaw ai majaw mungshawa si hkala hkrum ai re lam, ginra mungshawa ni kaw na chye lu ai.
Dai hpawt hkying 5:00am aten daram kaw nna, San Chyoi hte Maw Tawng mare grup yin de gumshem Myen hpyen dap ni hpyen n-gun htu shadut htim gasat wa ai majaw, KIA pawng hpawm hpyen hpung ni hte gasat gala majan byin wa ai re lam chye lu ai.
Ya aten Hpakant ginra hta gumshem Myen hpyen dap ni gaw, shawoi na hta grau hpyen n-gun htu shadut htim gasat ai lam galaw nga ai majaw, lani hte lani gasat gala majan grau grau laja wa nga ai rai nna, mungshawa law malawng tinang shimlum dum ai shara de hpyen koi yen nga ai re lam chye lu ai.
