Myen hpyen dap ni gap dat ai Myawk si mare kaw wa hkrat nna, Mungmasha marai ( 3 ) hkala hkrum
KIA Dap Ba ( 2 ) Dap Dung ( 14 ) ginra hta shamu shamawt nga ai Myen hpyen hpung ni, June praw 4 ya shana yup tung hkying 12:30am aten daram hta grup gra de laknak kaba
gap bun ai majaw, Danai Lidu lam Nawnglung Kawng Ra mare ka-ang kaw pala si ( 4 ) wa hkrat kapaw ai majaw, mungmasha marai ( 3 ) hkala nna, Dumsu langai si mat ai lam, buga masha ni kawn chye lu ai.
Pala si langai gaw, gaida hkan nu ni a Nta kaw wa hkrat kapaw ai majaw, Jan Lanawng Kaw Ja asak 56 ning a ladi kaw hkra, kasha yan rai nga ai shayi Nbwi Lu asak 19 ning, Pai lahpa hte Hkra lata lahpum kaw dingset nna, shayi Nbwi Roi asak 17 ning gaw lagaw lahkawng maga dingset hkra ai lam, salang Nhkum Bawk Di a Dumsu 1 mung, sinat kaba si hkra nna si mat ai lam na chye lu ai.
Hkala hkrum ai yan nu ni gaw, ya aten Danai mungshawa tsi rung hta tsi tsi hkam la nga ai lam na chye lu ai.
Myen hpyen dap Hk.L.Y ( 126 ) ni kawn June praw 3 ya jahpawt KIA Dap Ba ( 2 ) Dap Dung ( 14 ) shawnglam hpyen hpung ni a Mai Sak Post hpe wa htim gap dat ai majaw, gasat gala majan byin wa ai re.
Daini June praw 5 ya shani hta mung KIA Dap Dung ( 14 ) hpyen hpung ni nga ai shara de, laknak kaba ( 2 ) lang matut gap bun ai lam, Myen hpyen dap ni gaw, ya aten hta KIA Dap Ba ( 2 ) ginra de hpyen n-gun kaba jat bang nga ding yang re lam, shawnglam hpyen shisawk salang langai tsun dan ai kawn chye lu ai.
