Myen hpyen dap ni hkam tawn ai bawm Mungmasha marai ( 5 ) kapaw la nna tsi rung du
Mungmyit Sinli Ga ( Kachin Sub-State ) KIA Dap Ba ( 6 ) ginra, Munggu Man Jak makau kaw dap jung shara jahkrat nga ai, Myen hpyen dap, Dapnu ( 11 ) ni hkamtawn ai bawm hpe, January praw 8 ya shani hkying 11:30am aten hta Munggu mare lawk ( 6 ) na mungmasha marai ( 5 ) kapaw la ai lam chye lu ai.
Bawm hkala hkrum ai ni gaw, Hpungtau Wuyawng Zawng Hkawng, Salang Wuyawng Hkawng Dau, Salang Wuyawng Dai Ze, Salang Luksing Ying Yaw, Salang Cha Lau Fa ni re. Shanhte gaw Layang hpun wa ret na matu lung wa ai shaloi Man Jak, Myen hpyen dap makau kaw wa kapaw la ai re lam, buga na salang langai shana wa ai.
Machyi masha ni gaw ya aten Mangshi tsi rung kaw tsi tsi hkamla nga ai, marai ( 3 ) gaw loi hkala sawng ai hta Hpt. Zawng Hkawng a pai lagaw daw mat ai lam, salang wa tsun ai.
Man Jak makau kaw dap jung shara jahkrat nga ai Myen hpyen dap ni gaw, ya bawm kapaw la ai shara de mungmasha ni hpe tam lu, tam sha lam n-galaw na matu, tsun sadi jaw da ai kaw ya na zawn byin wa ai re lam chye lu ai.
