Myen hpyen dap ni hpyen shamu shamawt hkawm na hpe mare masha ni grai hkrit tsang nga

                                                                                 Photo Credit; FB

Muse Ginwang,  KIA Dap Ba (6) Dap Dung (9) ginra Gang nan mare makau Nhtum hkyet kaw October shata 30 ya jahpawt hkying 7:30am aten kaw nna myen hpyen dap Dapnu 88 kata na hpyen hpung ni hte Dap Dung 9 kata na hpyen hpung ni, gasat gala majan byin ai lam chye lu ai.

Myen hpyen dap 88 kata na hpyen hpung ni gaw Dap Dung 9, Kung 2 ni dap jung nga ai shara de October shata 28 ya shani kaw nna htu shadut lung wa sai re.

Dai hpang October shata 30 ya jahpawt hkying 7:30am aten hta mung myen hpyen dap ni Gang Nan du hkra lai kau da nna bai nhtang wa ai shaloi Dung 9 kung 2 kata na hpyen hpung ni hte ang katut gasat poi byin ai re lam chye lu ai.

“Gasat poi byin ai lam gaw shanhte hku nna hkrup mara majoi htim hkawm, kanaw hkawm rai nna anhte nga ai shara de chyu kanaw hkawm ai lam re ngu hkamla ai” nga nna shawng lam na salang langai tsun dan ai.

October shata 29 ya jahpawt kaw nna myen hpyen dap ni, hpyen man baw lung wa ai ten, mu ang ai mung mare masha ni yawng hpe rim woi nna KIA hpyen hpung ni nga ai shara de htu shadut lung wa ai majaw gasat poi byin ai re.

Dai shana hta gaw shanhte lung wa ai shaloi Man Lung mare baw kaw nga rem nga ai Mungshawa marai lahkawng hpe mung laja lana jawm adup abyen da ai re. Dai kaw nna lai lung mat wa yang mu ang ai ni yawng hpe rim woi mat wa nhtawm dap jung ai shara kaw du jang dai shana nan yawng hpe bai dat dat sai re hpe mung chye lu ai.

Adup abyen hkrum ai mare masha lahkawng hta na langai mi gaw mare kaw nna sa tau la ai ni hte akajawng sha hkrum ai majaw lawt mat wa ai raitim langai mi gaw shanhte a lata kaw naw re lam chye lu ai.

Mungshawa ni hpe rim woi ai lam gaw, shanhte lung wa ai shaloi bungli sa galaw ai mare masha ni, KIA hpyen hpung ni hpang de shiga shana tsun dan kau na tsang ai majaw mu ang ai ni yawng hpe rim woi mat ai re lam dai ginra na salang langai tsun dan ai.

Matut nna hpyen hpung lahkawng maga shada maja hkat nga ai re hte majan mung bai byin wa na masa nga ai re, ni nawn ai mare masha ni mung myen hpyen dap ni hpyen shamu shamawt hkawm na hpe grai hkrit tsang nga ai lam shawng lam shi sawk ni kaw nna chye lu ai.