Myen Hpyen Dap ni hte MNDAA ni gasat poi byin

Mungmyit Sinli Ga ( Kachin Sub-state ) KIA Masat (17) Dap Dung ginra, Loi Hkam Bum, Lau Gung Haw, Hku Yau makau kaw May shata praw 3 ya shani hkying 10:30am aten kaw nna hkying 11:00am aten hta Myen hpyen hpung ni hte MNDAA ni gasat poi byin ai lam na chye lu ai.

Nam Hkai mare de na lung wa ai Myen Hpyen Dap, Dap Nu (99) hpyen hpung n-gun 80 daram gaw MNDAA ni nga ai shara de htu shadut lung wa ai majaw gasat poi byin ai re lam, shawng lam shisawk ni shana wa ai kaw na chye lu ai.

Lak nak lang rawt malan wuhpung ni rai nga ai Kokang (MNTJP/MNDAA), Ta-ang (PSLF/TNlA) hte Rakhine (ULA/AA) Dap Hpawm ni gaw May shata praw 3 ya shani kaw nna May shata htum du hkra, gap hkat jahkring na lam hpe ndau laika shapraw da ai raitim, Myen hpyen hpung ni htu shadut lung wa ai majaw, ya na zawn gasat poi byin ai re lam chye lu ai.