Myen hpyen dap ni hte MNDAA, TNLA pawng hpawm hpyen hpung ni gasat gala majan byin
Mungmyit Sinli Ga (Kachin-Sub-State) KIA Dap Ba (6), Dap Dung (9) ginra, Ting Kaw Bum kaw Kokang (MNDAA), Balawng (TNLA) pawng hpawm hpyen hpung ni hte Myen Hpyen Dap, Dapnu 99 kata na hpyen hpung ni October shata praw 3 ya jahpawt hkying 9:05am aten kawn laja lana gasat gala majan byin nga ai lam, shawng lam shi sawk ni kaw nna chye lu ai.
Gasat gala byin ai shara de, Namhpakka mare hta dap jung nga ai myen hpyen dap Hk.L.Y 123 ni kawn laknak kaba 120mm hte lahkawng lang gap bun ai rai nna, matut manoi sinat nsen mung naw ngoi nga ai re lam, ginra masha ni tsun dan ai.
Myen hpyen hpung ni gaw hpyen n gun 100 daram nga ai hpyen man 2 hte Kokang hte Balang ni dap jung da ai shara de htu shadut lung wa ai majaw, gasat gala majan byin ai re.
Myen hpyen dap kaw nna September 29 ya shani ndau laika shapraw da ai hta kasu kabrawng wuhpung ngu masat da ai shara hta lai nna, ngam ai ginra ni hta hpyen shamu shamawt lam hte seng nna October shata praw 1 ya shani kaw nna 31 ya shani du hkra, shamu shamawt ai lam n galaw na matu ndau laika shapraw da ai raitim, Myen hpyen dap ni hpyen shamu shamawt htu lung wa ai majaw gasat gala majan bai byin nga ai re.
Lai wa sai September shata hta mung Dap Dung 36 kata na hpyen hpung ni hte Myen hpyen hpung ni gasat gala majan byin ai majaw, ni nawn ai shara kaw na mare masha ni hpyen koi yen nga ai rai nna, ya aten du hkra bai nhtang wa ai lam nnga shi ai re hpe mung chye lu ai.
