Myen hpyen dap ni hte TNLA hpyen hpung ni gasat majan byin
Mungmyit Sinli Ga ( Kachin Sub-State ) KIA Dap Ba ( 4 ) Dap Dung ( 34 ) ginra, Kawng Hung mare makau kaw April praw, 5 ya jahpawt hkying 9:50am aten hta TNLA hpyen hpung ni hte Myen hpyen dap Hk.L.Y ( 568 ) na hpyen hpung ni gasat majan byin ai. Shani hkying 11:00am aten hta Pin Htawm mare makau kaw Myen hpyen dap Hk.L.Y ( 59 ) na hpyen hpung ni hte TNLA hpyen hpung ni numdaw kalang mi bai gasat majan byin ai lam shawng lam shi sawk ni kawn chye lu ai.
KIA Dap Ba ( 4 ) Dap Dung ( 9 ) ginra hta mung April praw, 5 ya shani Mungbaw Hka mahkrai Da Lung mare kaw nga ai SSPP/SSA magam gun dingsa rai nga ai Slg. Sai Aik Lu gaw Asak ( 5 ning ) jan re Hpunggyi ma marai ( 2 ) hpe Mungbaw Hka maga de shaga wa nna yup tsi jaw shanang nhtawm Miwa lauban Slg. Jan Shin Wu hpe dut sha na matu ap ya nga ai ten hkauna kawn nhtang wa ai mare masha ni wa mu hkrup ai majaw Slg. Sai Aik Lu hpe Myen Balik ni lata de rim ap ya dat ai lam na chye lu ai.
