Myen Hpyen Dap ni kawn KIA nga ai shara de sinat kaba gap bun

Nahpaw Lisu Pa Jau kaw Dap Jung shara jahkrat nga ai Myen Hpyen Dap ni gaw, October shata 19 ya shana de hkying 5:40pm aten hta KIA Dap Nawng Dap Dung 254 hpyen hpung ni shara la nga ai post maga de sinat kaji hte sinat kaba gap bun ai lam chye lu ai.

Myen hpyen ni gaw KIA ni nga ai Kinsa Nhkang Post de sinat kaji hte gap bun ai rai nna, Hkungrang Post maga de gaw sinat kaba 9 lang gap bun ai lam, shawng lam shi sawk ni tsun ai.

Ya aten hta Myen Hpyen Dap ni gaw KIA Dap Ba 3, 4, 10 ginra ni hta mung hpyen n gun tsa kaba hte bai shamu shamawt wa nga ai lam, shawng lam shi sawk ni shana wa ai kawn chye lu ai.

Ndai October shata 14 ya shani hta mung KIA Dap Ba 8 Dap Dung 5 hpyen hpung ni a Awng Jat Post hpe Myen Hpyen Dap ni sa gap ai lam ni byin ai re.