Myen hpyen dap ni kawn mungmasha ni hpe shinggan pru hkawm ahkang pat tawn ai majaw, mungmasha ni yak hkak hkum nga
Mungmyit Sinli Ga ( Kachin Sub-State ) KIA Dap Ba ( 10 ) Dap Dung ( 17 ) ginra, Mungmyit ginwang, Nawng Ping mare grup yin hta shamu shamawt du nga ai, Hk.L.Y ( 114, 115 ) na pawnghpawm dap ni gaw, August 22 ya shani hta Nawng Ping mare masha ni hpe shinggan pru hkawm ahkang pat tawn ai lam na chye lu ai.
Nawng Ping mare masha ni gaw, yi sun hkau na galaw sha ai ni re. Ya na zawn Myen hpyen dap ni shinggan pru hkawm ai lam hpe hkum pat tawn ai majaw, mare masha ni grai yak hkak jam jau nga ai lam, ginra masha ni kawn chye lu ai.
KIA Dap Ba ( 3 ) Dap Dung ( 1 ) ginra, Manmaw ginwang kata na Myen Balik ni mung, August 21 ya shana kawn Manmaw, Manje, Nmawk mare ni hta shana hkying 8:00pm aten kawn lam hkan lai wa lai sa mungshawa ni hpe san jep nga sai re.
Num, La n lata ai san jep nhtawm, ntsen nhten ai masha ni hpe gaw Balik dap de woi mat ai, ya na zawn san jep ai lam hpe shana shagu matut jep mat wa na re lam, ginra shisawk ni kawn chye lu ai.
