Myen hpyen dap ni lai wa lai sa mungshawa ni hpe laja lana sawk jep nga

Sinpraw Ginwang Ginjaw, KIA Dap Ba 3, Dap Dung 1 ginra, Chyau Hkawng mare kaw shara jahkrat nga ai Myen hpyen dap ni gaw, July shata 27 ya shani hta lai wa lai sa mungshawa ni hpe laja lana sawk jep nga ai lam na chye lu ai.

Manje mare kaw na Jan Mai, Hka U, Gat Rawn, Ding Sing, Hpaw Gum hte Nba Pa mare de lung wa ai mungshawa ni hpe n shalai pat kau ya ai. Bum mare na cycle hte yu wa ai ni hpe mung cycle hte shingma ba ( ေက်ာပုိးအိတ္ ) ni hkan gasawk nhtawm gara de sa hpa baw bungli galaw ai nga nna jep ai lam, Manje buga na Salang langai shana wa ai kawn chye lu ai.

Manje hpyen yen dabang kaw nga ai mungshawa ni gaw ya nlai shangun ai bum de sha kawa makru ni tam daw dut nna gumhpraw tam lang nga ai re. Ya na zawn Myen hpyen dap ni kawn lai wa lai sa lam hpe hkum pat kau ai majaw mungshawa ni yak hkak nga ai lam na chye lu ai.