Gumshem Myen hpyen dap ni gasat gala majan byin ai lam nnga ai shara hkan, laknak kaba hte hkrup mara gap shadam bun nga ai lam chye lu ai.

April shata 25 ya shana hkying 11:30pm aten daram hta M.P.Hk gumshem Myen hpye dap ni laknak kaba hkrum mara gap shadam bun ai majaw, Myitkyina Thida lawk kaw laknak kaba si (2) wa hkrat kapaw ai hta mungshawa si hkala hkrum ai lam, ginra masha ni kaw na chye lu ai.

Waimaw ginra Lamyang, Jam Ga hte Nawng Si Paw grup yin hta mung, gasat gala majan byin ai lam nnga ai kaw gumshem Myen hpyen dap ni ndai laman, laknak kaba hte hkrup mara gap shadam bun nga ai lam chye lu ai.

Ya aten Manmaw ginra hte Hpakant lam grup yin hta gumshem Myen hpyen dap hte KIA pawng hpawm hpyen hpung ni gasat gala majan byin nga ai rai nna, gasat gala majan nbyin ai shara ni hta mung, gumshem Myen hpyen dap kawn nbungli, drone laknak kaba ni hte hkrum mara gap shadam bun nga ai lam chye lu ai.