Myen hpyen dap ni Man Mau mare kaw na dum nta hkan shang sawk
Lashu Myen Hpyen Dap, Dap Nu (99) kaw na hpyen n-gun 40 jan gaw May shata 17 ya shana hkying 8:30pm aten daram hta Muse, Man Mau mare kata na dum nta hkan lata shang nna jut shagu sawk tam ai lam galaw ai re hpe na chye lu ai.
“Shanhte hku na madung sawk tam ai gaw nanghpam hte seng ai arung arai ni, hpyen hte seng ai arung arai ni mu sawk jang gaw rim na hku rai ma ai, kaga gaw hpa hte seng nna shang sawk ai lam gaw nchye ai re” nga nna Man Mau mare kaw na Salang langai tsun dan ai.
Sawk tam ai lam galaw ai hta Manmau mare kaw na Salang Marip La Tawng hte Salang Hpauyam Hka Li yan a dum nta kaw hpun lauban ni hpun wa tawn da ai majaw, dai nta madu Salang lahkawng hpe mung shanhte na shara de woi mat wa sai re.
Hpun madu ni hpe phone gade matut ai raitim, phone nhta ai hprawng yen hkawm mat ai re majaw, dai nta madu Salang lahkawng lit la ra na masa nga ai rai nna, Man Mau mare kaw na Salang ni gaw shan lahkawng na hpun nre ngu ai hpe sakse sa hkam shaw la na matu sa wa sai re, bai du wa ai lam gaw nnga shi ai re lam Salang wa matut tsun ai.
Dum nta hkan shang sawk tam ai hta phone, gumhpraw hte shanhte ra ai arung arai ni la kau ya ai lam nga ai re hpe mung chye lu ai.
Lai wa sai ten Man Mau mare hta Myen Hpyen Dap ni kaw nna dum nta hkan shang sawk tam ai lam nnga ai rai nna, ya na zawn galaw wa ai majaw mungmare masha ni myit tsang nga ai sha n-ga, Muse mare kata de mung lawk shagu shang sawk ai lam galaw na re hpe na chye lu ai.
