Myen hpyen dap ni, mungmasha ni a dum nta ni hpe wan nat jahten kau ya ai hte arung arai ni hpe mung la kau ya

KIA Dap Ba 1 Dap Dung 22 ginra, Daru Bum Ninghtawn KIA hpyen hpung ni shara la nga ai Kawng Ja Post hpe November shata 13 ya shani Hk.L.Y 37, 121 dap ni wa htim gap dat ai majaw, Kawng Ra mare hte Sut Ra mare na mungshawa ni nam maling de hprawng yen mat ai re lam, ginra shi sawk ni kawn chye lu ai.

Mungshawa ni nam de hprawng yen nga ai ten Myen hpyen hpung ni gaw, nta hkan na manu dan ai arung rai ni hte dumhpau sinat lau 7 hpe la mat wa ya ai sha n-ga gat seng, shat gawk, nta nkau hpe mung wan nat jahten kau ya ai lam chye lu ai.

Hprawng yen nga ai mungmasha yawng marai 40 hpe dai ni November shata 17 ya shani hta Hka Garan mare na KBC, RCM nawku hpung woi sara ni hte lit nga ai salang ni sa du gawan lakawn la nna, ya aten Hka Garan mare na KBC, RCM nawku jawng wang hta shara jahkrat tawn ai lam chye lu ai.