Myen hpyen dap ni mungshawa ni a hkauna hpe zing madu la
Manmaw Ginwang, Man Je Ninghtawn kata na mare masha htinggaw 15 a lamu ga hkauna Eka 610 hpe daining na ladaw hta tsep kawp nmai galaw lu sai lam, Myen hpyen dap kaw nna sadi jaw tsun shana wa ai re hpe chye lu ai.
“Manje ninghtawn, Ga Ra Yang mare kaw dap jung nga ai Hk.M.Y (601) na Myen hpyen du langai mi gaw manje mare salang ni hpe shaga nna tsun ai. Daining gaw hkauna de kachyi mi pi hkum kanip sa, hkauna madu ni hpe wa tsun ya marit ngu htet dat ai” nga nna Manje mare na salang langai shana wa ai kaw nna chye lu ai.
Lai wa sai March shata 22 ya shana daw hkying 3:00pm aten hta Manje mare salang ni hpe HK.M.Y (601) hpyen dap de shaga la nna hkauna madu ni hpe tsep kawp nmai galaw sha lu sai lam tsun shana dat ai re hpe chye lu ai.
Ga Ra Yang mare kaw dap jung nga ai Myen hpyen dap Hk.M.Y (601) hte HK.M.Y (301) kata na hpyen du ni hte seng ang ai mung chying uphkang (ေထြအုပ္) salang ni gaw mungshawa htinggaw 15 hpe manje ninghtawn rung kaw shaga la nna,mam dan la ngut jang tsep kawp nmai galaw sha sai lam, hpyen dap wang masat na re majaw myit hkrum ta masat lak mak htu ra na lam, ja gumhpraw manu jahpu hte daw dan mari la ai nre sha hpyen dap gaiwang shatai na matu tinggyeng masat la ai re lam, lai wa sai 2020 ning October shata nhtoi 26 ya shani hta tsun lai wa sai re.
Myen hpyen dap kaw nna ndai lamu ga ni hpe tsep kawp nlu galaw sai lam, lai wa sai shaning kaw nna lang hte lang tsun shana da ai rai nhtawm hpyen dap masat la hkrum ai Mungshawa htinggaw 15 ni kaw nna mung ndai lamu ga ni hpe tsep kawp nlu jaw ai lam, ta masat lak mat nlu htu ya ai lam tsun da ai re hpe mung matut chye lu ai.
Myen hpyen dap kaw nna tsep kawp nmai galaw sha sai lam tsun shana dat ai hkauna ni gaw Man je Ninghtawn kata na Ga Ra Yang mare, Nam mahpoi mare hte Myitung kahtawng na mare masha htinggaw 15 a hkauna lamu ga ni rai nna, yawng pawng yang hpyen dap kaw nna masat la ai Eka 610 tup re lam chye lu ai.
