Myen hpyen dap ni mungshawa ni hpe jahkrit shama, arung arai la kau ya
Mungmyit Sinli Ga ( Kachin Sub-state ) KIA Dap Ba 6 Dap Dung ( 9 ) ginra hta shamu shamawt du nga ai Myen hpyen Dapnu 99 kata na Hk.M.Y 418 na hpyen hpung ni gaw, Dima mare makau Nawng Ing mare na mungshawa ni hpe jahkrit shama galaw ai sha n ga arung arai ni hpe mung la kau ya ai lam na chye lu ai.
Myen hpyenla ni gaw, nta hkan na U ni rim sha gap sha ya ai, n gu, nhtu zawn re ni nta madu ni kaw ahkang nhpyi ai la mat wa ya ai zawn re ni nga ai, bum de mare masha ni wan n ga nra ju ai ni shana hkan wan wut, wan nan ai hpe mu jang mung, nanhte KIA ni hpe bau tawn ai nga nna mara shagun jahkrit ai lam, buga na Salang langai shana wa ai.
Lai wa sai aten hta mung, Dapnu 99 kata na hpyen hpung ni wa nga ga ai dai hpyen hpung ni gaw ya na hpyen hpung ni zawn n gum shem ma ai shanhte a kaba ni hpe sa tsun jang hpa nra ai. Ya ndai ni gaw shanhte a kaba ai ni hpe mung nmai sa jahkrum ai nga tsun ai, mare masha ni hpe adup abyen ai lam gaw nnga ai raitim, ya na zawn mungmasha ni hpe jahkrit shama, arung arai ni hpe kam mara, galaw ya ai majaw mungmasha ni grai hkrit tsang nga ai lam, Salang wa matut tsun ai.
Ndai Myen hpyen hpung ni gaw, April shata 14 ya shani hta Nawng Ing mare kawn Dima mare laika sharin jawng hta bai wa du nga ai rai nna hpyen n gun 60 daram re lam na chye lu ai.
