Myen hpyen dap ni nbungli hte wa gap gasat ai majaw, mungshawa si hkala hkrum

Gumshem Myen hpyen dap ni nbungli hte wa gap gasat ai majaw, mungshawa si hkala hkrum ai lam chye lu ai.

August shata 31 ya shani hkying 11:30am aten daram hta Waimaw ginra kaw gumshem Myen hpyen dap ni nbungli hte wa gap gasat ai majaw, asak 8 ning re num kasha langai asak si sum mat nna, marai 4 hkala hkrum ai lam, ginra mungshawa ni kaw na chye lu ai.

Si hkala hkrum ai mungshawa ni gaw, Waimaw kaw hpyen koi yen nga ai rai nna, Lamyang mare dum nta de jahkring mi gan wa ai kaw, Myitkyina na rawt lung wa ai gumshem Myen hpyen dap nbungli hte bawm wa jahkrat gap gasat ai majaw, si hkala hkrum ai re lam chye lu ai,

Ya aten Waimaw ginra de gumshem Myen hpyen dap ni hpyen n-gun htu shadut shamu shamawt ai lam ding yang galaw nga ai hta gasat gala majan mung matut manoi byin nga ai sha n-ga, gumshem Myen hpyen dap ni nbungli, drone, laknak kaba ni hte hkrum mara gap gasat nga ai majaw, mungshawa si hkala hkrum ai hte dum nta ni mung hten za hkrum nga ai re.