Myen Hpyen Dap ni shaga woi mat ai masha marai (5) kaw na marai (4) hpe bai dat ya
June shata 23 ya jahpawt hkying 9:00am aten hta Myen Hpyen Dap, Dapnu (88) hte Dapnu (99) ni kaw nna shaga woi mat ai Kuthkai Ginwang, Na Hkyem ginra, Tung Hkam mare masha marai 4 hpe shani hkying 11:00am aten hta bai dat ya sai lam chye lu ai.
Rim woi mat ai ni kaw na bai dat hkrum ai ni gaw, Salang Marip Ma Dim asak (24) ning, Shadang Labang Tu asak (35) ning, Salang Maran Brang Awng asak (30) ning hte Salang Lasham Tu asak (40) ning ni rai nna, Tung Hkam mare kaw naw ngam nga ai Dapnu (99) hpyen hpung ni kaw lawm ai Salang Pausa Gam Seng asak (40) ning hpe gaw garai ndat ya shi ai lam chye lu ai.
Myen Hpyen Dap ni shaga woi mat ai mabyin lawng lam hte seng nna buga masha langai ya na zawn tsun ai hta, “Tung Hkam mare kaw Myen Hpyen Dap, Dapnu (88) hte Dapnu (99) ni, June shata 22 ya shani Nam Hu mare de na machyi masha ni hpe hpai nna wa rawng taw ai, mana Tung Hkam mare kaw yup ma ai, dai hpawt Dapnu (88) ni gaw Tung Hkam mare a sinna maga Nawng Hpan mare de yawng mat wa ai shaloi, ndai mare masha marai 5 hpe woi mat wa ai hta, marai langai gaw Tung Hkam mare kaw naw ngam taw nga ai Dapnu (99) ni kaw lawm taw ai” nga nna tsun ai.
Myen Hpyen Dap ni shaga woi hkrum ai Salang langai hpe matut mahkai san yu ai shaloi, shanhte a arung arai ni gun shangun ai, Escort a hpang kaw mung shawa hpe ning-gang shatai nna woi lang ai re” nga nna tsun ai.
Ya aten KIA Masat (4) Dap Ba, Masat (8) Dap Dung hte KIA Masat (29) Dap Nawng Dap Dung ginra de, KIA hte Myen Hpyen Dap ni gaw June shata 17 ya shani kaw nna shani shagu ngu na daram gasat poi byin nga ai re majaw, Na Hkyem grup yin kaw na mare nkau ni hta Myen Hpyen Dap ni kawn jahkrit shama ai lam, dum nta hkan na arung arai ni shaw sha, mya sha ai lam ni galaw ai sha n-ga, mare kahtawng shagu na masha shaga la nhtawm, rai ni gun shangun ai lam ni galaw nga ai re hpe na chye lu ai.
