Myen hpyen hpung hte KIA hpyen hpung ni numdaw 2 lang laja lana gasat gala majan matut byin
Mungmyit Sinli Ga ( Kachin Sub-State ) KIA Dap Ba ( 6 ) Dap Dung ( 9 ) ginra, Bum Pri Bum Ginwang Daw, shara ni hta shamu shamawt nga ai Myen hpyen dap, Dapnu ( 88 ) kata na hpyen n-gun ( 100 ) daram hte KIA hpyen hpung ni, August 30 ya shani numdaw 2 lang laja lana gasat gala matut byin ai lam na chye lu ai.
KIA hpyen hpung ni shara la nga ai Malun Bum maga de Myen hpyen hpung ni shamu shamawt sa wa ai majaw, daini hkying 12:30pm aten kawn hkying 7:00pm aten du hkra laja lana gasat gala majan byin ai.
Gasat gala majan byin ai shara de, hpyen n-gun jat lung wa ai Mungbaw hka mahkrai na Myen hpyen hpung ni, Nam Um mare kaw wa du nga ai ten, 60mm, 82mm sinat kaba ni hte majan byin ai maga de gap bun ai.
Sinat kaba gap bun ngut ai hpang majan byin ai shara de, matut lung wa yang hkying 9:30pm aten hta Lai Hpawng Kawng kaw numdaw 2 lang laja lana bai gap hkat ai re lam, shawnglam shisawk ni kawn chye lu ai.
