Myen hpyen hpung hte KIA ni gasat gala majan byin

Mungmyit Sinli Ga ( Kachin Sub-State ) KIA Dap Ba ( 4 ) ginra hta shamu shamawt nga ai Myen hpyen dap, Hk.L.Y ( 13 ) na hpyen hpung hte KIA hpyen hpung ni, February 25 ya jahpawt hkying 9:55am aten hta Zelan Ninghtawn kata Man Loi Mawk mare dingsa kaw gasat majan byin ai lam, shawnglam shisawk ni shana wa ai.

KIA Dap Dung ( 9 ) ginra, Zaimaw mare kaw du nga ai, Myen hpyen dap, Dapnu ( 88 ) kata na hpyen hpung ni, February 25 ya shani Bang Law mare na salang Aik Yi, salang Ung Myint, Mandung mare na salang Tar Nyi hte Shwe Myint marai 4 hpe gyit dun woi hkawm ai lam na chye lu ai.

February 25 ya shani hta sha, KIA Dap Ba ( 1 ) Dap Dung ( 22 ) ginra, Sumpra bum maga de na yu wa ai, Hk.L.Y ( 15 ) na hpyen hpung hte KIA hpyen hpung ni, Htingbai Lungchyat kaw gasat majan byin ai.

Ndai Htingbai Lungchyat npu kaw laiwa sai, February 23 ya shani hta mung, KIA hte Myen hpyen hpung ni gasat majan byin ai hpe chye lu ai.