Myen hpyen hpung hte KIA ni shara shagu ngu na daram de, gasat gala majan byin
KIA Dap Ba ( 2 ) hpyen hpung ni a shawnglam post kaw, April 12 ya jahpawt hkying 7:15am aten hta Myen hpyen hpung ni htu shadut lung wa ai majaw, shingla gasat majan byin ai. Shani hkying 11:30am aten hta mung, KIA Dap Dung ( 11 ) ginra, Mu Gawng hka, Tinghpra bum makau kaw mung gasat majan byin ai lam, shawnglam shisawk ni kawn chye lu ai.
KIA Dap Nawng Dap Dung ( DNDD ) Masat ( 254 ) ginra rai nga ai Galang Ja Pa kaw mung, April 12 ya jahpawt hkying 8:10am aten hta KIA hpyen hpung hte Myen hpyen hpung ni gasat majan byin ai.
KIA Dap Ba ( 9 ) Dap Dung ( 6 ) ginra hta shamu shamawt nga ai Myen hpyen hpung hte KIA hpyen hpung ni mung, April 12 ya shana daw hkying 5:20pm aten hta Hka San hka hte Tau Byen hka mazup kaw gap hkat ai lam chye lu ai.
Mana yup tung hkying 12 daram hta KIO ginjaw ginra grup yin de mung, Hka Ya bum hte Bum Re bum kaw shara jahkrat nga ai Myen hpyen dap ni laknak kaba hte gap bun ai lam chye lu ai.
Myen hpyen dap ni gaw ya aten hta numdaw mi bai KIA ni nga ai shara shagu ngu na de, hpyen n-gun laknak n-gun law law hte shamu shamawt lung wa nga ai majaw, laja lana majan byin wa na hpe mungshawa ni hkrit tsang nga ai lam, buga masha ni kawn chye lu ai.
