Myen hpyen hpung hte KIA, TNLA ni gasat gala majan byin

KIA Dap Ba ( 3 ) Dap Dung ( 1 ) ginra hta shamu shamawt nga ai Myen hpyen hpung hte KIA hpyen hpung ni, April praw 3 ya jahpawt hkying 9:50am aten hta Lajawng mare htum pa Lamung Nhkang Kawng kaw gasat gala majan byin ai lam, ginra shisawk ni shana wa ai.

Gasat gala majan byin ai shara de, Lung Ja Bum, Sindi Bum hte Lawa Yang kaw nga ai Myen hpyen hpung ni gaw, laknak kaba hte gap bun ai lam chye lu ai.

KIA Dap Ba ( 2 ) Dap Dung ( 11 ) ginra hta mung, April praw 2 ya shana hkying 6:40am hta Ting Rat hka mahkrai mayan, shamu shamawt nga ai Myen hpyen hpung ni hpe KIA hpyen hpung ni sa htim gap ai kawn gasat gala majan byin ai.

Mungmyit Sinli Ga ( Kachin Sub-State ) KIA Dap Ba ( 4 ) Dap Dung ( 34 ) ginra hta mung, April praw 2 ya shani hkying 1:30pm aten hta Si Paw hte Kung Tar mare lapran lam maw kaba kaw Myen hpyen hpung hte TNLA hpyen hpung ni gasat gala byin ai re.

Gasat gala majan byin ai majaw, laiwa laisa mungshawa ni a modo yawng hpe Myen hpyen dap ni kawn pat shingdang kau ai lam chye lu ai.