Myen hpyen hpung hte TNLA, MNDAA pawng hpawm hpyen hpung ni laja lana gasat gala majan byin
Mungmyit Sinli Ga ( Kachin Sub-State ) KIA Dap Ba ( 6 ) Dap Dung ( 9 ) ginra hta shamu shamawt nga ai Myen Dapnu ( 11 ) kata na hpyen hpung hte TNLA, MNDAA pawng hpawm hpyen hpung ni, August 31 ya jahpawt hkying 6:00am aten daram kaw nna hkying 9:00am aten daram du hkra, Nkang Bum, Bum Run Bum lapran kaw laja lana gasat gala majan byin ai lam, shawnglam shisawk ni kawn chye lu ai.
August 30 ya shani hta mung, KIA Dap Ba ( 10 ) Dap Dung ( 17 ) ginra hta shara lahkawng kaw Myen hpyen Dapnu ( 99 ) hte TNLA, MNDAA pawng hpawng hpyen hpung ni gasat majan byin ai.
Shani ka-ang hkying 12:30pm aten kawn shana maga hkying 5:00pm aten daram du hkra, Bang Gaw Bum, Lau Yin Jai Bum kaw kalang mi, Man Len Lin mare kawng kaw lahkawng lang ngu na gap hkat ai.
August 29 ya shani hta mung, Sai Leng hte Bang Gaw Bum marawn Lau Yin Jai Bum kaw TNLA, MNDAA pawng hpawm hpyen hpung ni nga taw ai shara kaw Myen hpyen Dapnu ( 99 ) ni htu lung wa ai majaw, hkying 1:30pm aten kawn hkying 3:30pm aten du hkra gasat gala majan byin ai lam chye lu ai.
Ya aten hta Myen hpyen dap ni gaw, KIA Dap Ba ( 4 ), Dap Ba ( 6 ), Dap Ba ( 10 ) ginra de, hpyen n-gun laknak n-gun ni modo law law hte Lashio maga kawn shani shagu ngu na lung nga ai lam, buga masha ni kawn chye lu ai.
