Myen hpyen hpung hte TNLA, MNDAA pawnghpawm hpyen hpung ni gasat gala byin
Mungmyit Sinli Ga ( Kachin Sub-State ) KIA Dap Ba ( 10 ) Dap Dung ( 17 ) ginra, Loi Dau Ginwang Mung Yaw sinpraw maga Loi Jak Bum lagaw, Bang Gyin Lung mare hte Bang Gyin Hai mare makau kaw Myen hpyen dap Hk.M.Y ( 420 ) dap hte TNLA, MNDAA pawnghpawm hpyen hpung ni, hkying 9:00am aten kawn hkying 11:00am aten du hkra gasat gala byin ai lam na chye lu ai.
Shana maga hkying 3:35pm aten hta Myen hpyen dap, Dapnu ( 99 ) kata na hpyenla hpring hpring htaw ai modo 3 hte gasat gala byin ai shara de n-gun jat lung wa ai lam, shawnglam shisawk ni kawn chye lu ai.
Ya aten hta KIA Dap Ba ( 6 ) Dap Dung ( 9 ) ginra hta mung, Myen hpyen dap, Dapnu ( 11, 88, 99 ) kata na hpyen n-gun 300 daram shamu shamawt ding yang rai nga ai lam, Dap Dung ( 9 ) na salang langai shana wa ai.
Ndai Dap Dung ( 9 ) ginra, Hpakawn bum hte Kawng Ngawn bum lapran kaw lai wa sai August 13 ya shani hta Myen hpyen hpung hte TNLA, MNDAA pawnghpawm hpyenhpung ni gasat majan byin lai wa sai re.
