Myen hpyen hpung ni hpe KIA ni bawm hte hkap shingla gasat
Mungmyit Sinli Ga (Kachin Sub-state) KIA Dap Ba 6, Dap Dung 36 ginra, Mungbaw hka mahkrai hte Namhkawng hka mazup makau kaw December shata 25 ya jahpawt hkying 10:04am aten hta Myen Hpyen Dap, Dapnu 99 kata na hpyen hpung ni hpe KIA hpyen hpung ni bawm hte hkap shingla gasat dat ai lam na chye lu ai.
KIA ni bawm hte hkap shingla gasat dat ai hpang, Myen hpyen hpung ni gaw grup gra de minute 30 daram du hkra, sinat kaji kaba hkrup mara gap sharu bun ai rai nna, Mai Hpang mare kaw nga ai Myen hpyen ni mung sinat kaba hte Lashap mare maga de 3 lang gap bun ai lam, ginra shi sawk ni kawn chye lu ai.
“Sinat kaji kaba ngoi ai majaw, Howa Buga Man Pying mare ni Christmas akyu hpyi hpawng mung jahkring kau ai” nga nna Mungbaw mare na Salang langai tsun dan ai.
December shata 23 ya shani hta mung KIA Dap Dung 36 ginra, Howa Bum kaw nga ai Myen Hpyen Dap, Hk.M.Y 14 na hpyen n gun 100 daram gaw, KIA hpyen hpung ni shara la nga ai Hpun Pyen Yang maga de htu shadut lung wa ai majaw gasat poi byin ai re.
KIA Dap Ba 6, Dap Dung 36 ginra de, December shata 20 ya shani kaw nna Myen Hpyen Dap, Dapnu 99 kata na hpyen hpung ni shamu shamawt htu lung wa ai majaw KIA hte gasat gala majan matut byin nga ai lam chye lu ai.
