Myen hpyen hpung ni hte KIA hpyen hpung ni gasat majan byin
KIA Dap Ba ( 1 ) Dap Dung ( 4 ) ginra ( 16 ) Mile makau Zup Mai Yang kaw April, 26 ya jahpawt hkying 9:30am aten hte hkying 11:30am aten laman Myen hpyen hpung ni hte KIA hpyen hpung ni gasat majan byin nna shana hkying 9:25pm aten ( 18 ) Mile Bung Swi Yang kaw numdaw kalang mi bai gasat majan byin ai lam shawng lam shi sawk ni kawn chye lu ai.
KIA Dap Ba ( 2 ) Dap Dung ( 11 ) ginra hta mung April, 26 ya shani hkying 11:15am aten kawn hkying 12:10pm aten laman Kasung mare baw lawk ( 1 ) kaw du nga ai Myen hpyen dap ni hpe KIA hpyen hpung ni sa htim gap ai kawn gasat majan byin wa nna Myen hpyen hpung gaw shara shagu de laknak kaba gap bun ai lam chye lu ai.
KIA Dap Ba ( 1 ) Dap Dung ( 4, 7 ) ginra maga na hpyen koi yen yu wa ai Mungshawa nkau mi hpe April, 26 ya shani Trinity Buga hpung kata kaw gan shara jahkrat da ya ai. Mungshawa nkau ni gaw nam kata kaw naw hprawng koi yen nga ai hte nkau mi gaw Tang Hpare mare kaw du nga sai lam chye lu ai.
