Myen hpyen hpung ni hte KIA hpyen hpung ni laja lana gasat majan byin
KIA Dap Ba ( 2 ) H.Q de April, 11 ya shani hkying 2:33pm aten hta Myen hpyen hpung ni kawn Helicopter ( 1 ), Sinat kaba ni hte wa htim gap bun nga ai aten Balai Nawng Hkauna pa maga kawn lagaw lam hte shamu shamawt lung wa ai Myen hpyen n-gun ( 200 ) daram gaw shana daw hkying 2:20pm aten hta KIA hpyen hpung ni nga ai Sut Manau Lam Shawng Lam Nawng Nyang, Shatwi Tu hte Hpri Tsut Post ni hpe laja lana htim gasat wa ai majaw KIA hpyen hpung ni hkap shingla gasat ai kawn gasat gala majan byin wa ai lam shawng lam shi sawk ni kawn chye lu ai.
KIA Dap Ba ( 2 ) Dap Dung ( 6 ) ginra Lai Nawng hku kaw shana daw hkying 3:30pm aten hta KIA hpyen hpung ni hte Myen hpyen hpung ni gasat majan byin ai.
KIA Dap Ba ( 2 ) Dap Dung ( 11 ) ginra kaw April, 11 ya shani hkying 3:00pm aten hta Pingdawng Masat ( 7 ) kaw nga ai Myen hpyen hpung ni kawn KIA Dap Dung ( 11 ) H.Q Kasung mare maga de Nbungli hte Sinat kaba wa gap bun ai majaw Mungshawa nkau mi Namti Lambraw Yang de hprawng koi yen nga ai lam chye lu ai.
KIA ( 254 ) Dap Nawng Dap Dung ginra hta mung Da Law maga kaw na lung wa ai Myen hpyen dap Hk.L.Y ( 93 ) dap ni hpe April, 11 ya shana daw hkying 4:15pm aten kawn hkying 6:00pm aten laman KIA hpyen hpung ni Remote Bom ( 1 ) hte hkap adem bun ai kawn gasat majan byin ai hte hkying 5:00pm aten hta Da Law maga na Myen hpyen Modo kaba ( 3 ) hte Galang Ja Pa maga de hpyen n-gun jat lung wa ai lam na chye lu ai.
