Myen hpyen hpung ni htu shadut lung wa ai majaw KIA ni hte laja lana gasat majan byin

KIA Dap Ba ( 9 ) Dap Dung ( 6 ) ginra, Ja Ra Yang makau Bum Chyang Bum Post kaw July, 14 ya dai hpawt hkying 7:30am aten hta Myen hpyen dap Hk.L.Y ( 120 hte 23 ) pawng hpawm hpyen n-gun ( 100 ) jan daram htu shadut lung wa ai majaw KIA hpyen hpung ni hte gasat majan byin ai lam shawng lam shi sawk ni kawn chye lu ai.

Hkying 10:00am aten kaw nna hkying 12:30pm aten laman numdaw ( 3 ) lang laja lana matut gasat majan byin ai lam chye lu ai.

July, 13 ya jahpawt hkying 6:10am aten hta mung KIA Dap Ba ( 2 ) Dap Dung ( 14 ) ginra Nam Hkam Jakli Daru hte Miwa Ja Hpawng Rung grup yin hta KIA hpyen hpung ni ginra jasan hkawm nga ai kaw Myen hpyen hpung ni hte gasat majan byin ai lam na chye lu ai.