Myen hpyen hpung ni Ja htu sha nga ai Mungshawa ni hpe jahkrit shama gau shale
KIA Dap Ba ( 2 ) Dap Dung ( 14 ) ginra, Ja Wang mare hte Lawt Ja mare kaw du nga ai Hk.L.Y ( 37, 297 ) na pawng hpawm hpyen n-gun ( 100 ) daram gaw June praw, 1 ya jahpawt
hkying 6:00am aten hta Lawt Ja mare na Slg. Lahpai Naw Ja hpe shaga la nna, tsun ai hta ndai laman M.P.Hk. kawn Ja htu sha ai Ja Wang Ja Maw hpe nbungli hte wa yu hkawm na re majaw, Ja maw kata na ginsum ni hpe run kau da nna lawan pru wa na matu, tsun ai lam na chye lu ai.
Dai Myen hpyen hpung ni gaw, Ja Wang Ja Maw hte Lawt Ja mare grup gra de sinat majoi gap shangoi jahkrit shama nga ai majaw, Mungshawa nkau mi gaw, Jahtu Zup mare de pru wa sai lam, Myen hpyen hpung ni kawn Slg. Dabang Gam hte kasha hpe lam madun ya na matu, woi hkawm nga ai lam mung na chye lu ai.
Dai Myen hpyen hpung ni, Ja Wang mare hte Lawt Ja mare grup yin hta Ja Htu lauban ni a Back Hoe ( 14 ) mung rim zing tawn ai rai nna, June praw, 1 ya shana hkying 6:00pm aten daram hta Myen hpyen hpung ni shimlam la ya nna, back-hoe ( 7 ) hpe gaw, Yuzana Ban Kawk maga de gau yu wa sai lam, dai ginra na mungshawa ni kawn chye lu ai.
