Myen hpyen hpung ni, laiwa laisa mungshawa ni hpe sawk jep, adup zingri lam galaw
Mungmyit Sinli Ga ( Kachin Sub-State ) KIA Dap Ba ( 4 ), Dap Dung ( 9 ) ginra, Zelan mare kaw nga ai, Dapnu ( 88 ) kata na Myen hpyen hpung ni gaw, February 17 ya shani laiwa laisa mungshawa ni a Modo, Cycle hte masha hpe sawk jep ai lam, buga masha ni shana wa ai.
February 16 ya shani hta mung, KIA Dap Ba ( 6 ) Dap Dung ( 36 ) ginra, Bang Sai mare hte Munggu lapran, laiwa laisa mungshawa ni hpe Myen hpyenla ni laja lana sawk jep, san ai lam chye lu ai.
February 15 ya shani hta mung, KIA Dap Ba ( 9 ) Dap Dung ( 6 ) ginra, Gat Noi kaw shara gan jahkrat nga ai, Hk.L.Y ( 255 ) dap na Myen hpyen hpung ni gaw ginra gawan hkawm ai aten, Woi Bum sa lam Nam Ya hka kaw Nga hkwi nga ai, Seng Hpra mare na salang Ah Di ( Lisu ) hpe mu nna, KIA magam gun re ngu mara tam adup zingri da ai lam, buga na salang langai shana wa ai.
Salang Ah Di gaw hpa magam gun mung nre yu yu mungmasha sha re. Myen hpyenla ni ya na zawn mara kata adup zingri nna bai dat dat ai lam gaw nga ai raitim, machyi sawng ai majaw, tsi rung du ra mat ai lam, salang wa tsun ai kawn chye lu ai.
